看粤语剧本唐伯虎点秋香学粤语
导语：《唐伯虎点秋香》是一部喜剧电影，由周星驰、李力持执导，周星驰、巩俐、郑佩佩等主演。该片讲述了江南才子唐伯虎对华太师府上的丫鬟秋香一见钟情，在船夫的帮助下他施展计谋混进了华府。下面YJBYS小编分享唐伯虎点秋香的粤语剧本，欢迎参考!
(唐府门前，好多人喺度等紧)
茄咧啡甲：哎～，点解呢吓?我等咗三个时辰喇，都未出嚟嘅?
茄咧啡乙：系啰，平时两个时辰到就会出嚟个噃。
(唐府下人出门倒垃圾)
仆人甲：啲垃圾放喺门口。
众仆人：哦!
众人(原来喺度等紧垃圾，都上去抢)：哎呀，抢呀抢呀!
茄咧啡甲：哈哈!哎呀，我终于揾到唐伯虎嘅墨宝喇!
众人(齐追茄咧啡甲)：我见到先架!畀返我呀!……
(唐伯虎手执毛笔，好似写字噉嘅款，原来系用豉油搽鸡翼)
仆人甲：一碟豉油够唔够“jaam5”，少爷?
唐伯虎：慢慢嚟!
仆人甲：少爷呀，出便好多人求画，真系唔理佢哋呀?
唐伯虎：今日我冇乜心情画画，同我醒多两箩垃圾佢哋算啦。
仆人甲：系，少爷!
仆人甲：(出门时在门中碰见祝枝山)祝公子。
祝枝山：哎，唐兄!
唐伯虎：哎，祝兄!
祝枝山：唐兄，救命呀。
唐伯虎：唉，睇嚟祝兄梗系输钱输到干干净净定嘞。
祝枝山：哈，生我者父母，知我者唐兄呀!
唐伯虎：江南四大才子之中，就以祝兄你最为洒脱，众人皆知!所谓风吹鸡蛋壳，财散人安乐，乃系祝兄你嘅座右铭呀。
祝枝山：过奖过奖，但比唐兄嘅风流不羁，小弟真系有如天渊之别呀!
唐伯虎：哈哈哈哈，之不过，祝兄你隔夜一百几呀两噉输，输完走嚟嗌救命，长此以往，唔系办法噃。
祝枝山：哎，有见地，小弟有见及此,所以破斧沉舟，一次过输晒我一世人可以输嘅钱，整整系三十万两，所以麻烦唐兄画返三十幅画，以嚟填债救命!
唐伯虎：明白明白。阿水，你出出去先!
仆人阿水：系，少爷!
唐伯虎(等阿水出去之后)：仆你个臭街，当呢度善堂呀?重要画卅幅?冇得倾!
祝枝山：哎呀，唔好噉啊，系我衰啊，系我衰喇。我而家叩头认错。你唔念吓当年僆仔嘅时候借本《玉薄团》畀你“目及”，你都念吓呢几年嚟我同你卖画卖到你冚家富贵吖!况且出便有成几两友喺出便话，如果三炷香我攞唔到三十幅画就劈开我几碌啊!你帮唔帮先?
唐伯虎：三柱香?哼，嗱咪话做兄弟嘅唔睇你喇，我即管喺你灵堂同你写副挽联，一写死有余辜，一写死不足惜!你是但拣句啦。
祝枝山：哎呀，伯虎啊，你唔好咁绝好唔好啊?最多我发毒誓，如果我再赌钱嘅话，我就畀天下最丑样嘅女人日日至体无完肤，摇摇欲坠为止，噉得未吖?
唐伯虎：吓?!咁悲壮嘅毒誓你都发得出?好，我即管救埋你呢次啦!人嚟，文房四宝侍候!
祝枝山：唐兄忠肝义胆，侠骨丹心!
唐伯虎：废话少讲，除衫!
祝枝山：吓?!除衫?
(地上铺满画纸)
祝枝山(成身赤裸)：喂，搞边科呀?
(唐伯虎用祝枝山的身体作画……)
祝枝山：噉玩法?
(……)
祝枝山：哗，认真神乎其技，真系畀你打死都抵呀!叫咩名堂啊?
唐伯虎：巴闭嘞?系叫做雄鹰展翅气吞天下图。呢度一幅已经抵偿到你三十万两，请你以后唔好再嚟烦我。
祝枝山：哈，一定一定。不过我更佩服唐兄之处，系要将我胸前双点作花，双掌作树，屁股化石，前足作云，后足作山。哎呀，嗰只鹰又用我身体边部分勾出嚟呀?
唐伯虎：系用阁下嘅子孙根。
祝枝山：哈呀，果然不出我所料，雄浑激情，勾出咗佢嘅神韵呀!
唐伯虎：只不过系鹰嘴上面担住嗰条虫仔啫，何来雄浑激情之有?唓!
祝枝山：都好，识转弯!
周星驰旁白：唐伯虎，于明宪宗成化六年庚寅年寅月寅日寅时出世，故名唐寅，因人属虎，故又名唐伯虎。唐寅聪明绝顶，号称诗画双杰，位列江南四大才子之首，为当时男女老少所崇拜嘅偶像。而最为人津津乐道嘅，乃系相传佢拥有八位天姿国色温柔贤淑嘅娇妻，晃如神仙美眷，羡煞旁人啊!
某老婆：举手!有冇百几十两喺你身度呀?攞出嚟顶住先嗱!有冇搞错啊?!得咁少!嚟啦来嚟……我又有银喇。
某老婆：磅水啦!
某老婆：铺铺你赢架，出千呀?
某老婆：旺吖嘛。
某老婆：打镬你吖嗱!
唐伯虎：几位娘子，有鸡翼食嘞。
某老婆：起埋骨先返嚟呀?咁耐?摆定未呀，摆定未呀，快啲呀!
某老婆：得喇，催命符咩!
唐伯虎：我幅百花争艳图……
某老婆：哎呀，喂，家阵借嚟垫垫台咋 ，唔使诈型呀?
某老婆：你家阵未死吖嘛，得闲咪画过第二幅啰。
唐伯虎：但系……
某老婆：咪讲咁多，嚟，猜返板先!财财，三叉仔，四伯父!饮!
唐伯虎：喂喂……
某老婆：咦呀，做咩啫?
唐伯虎：我本诗集啊!
某老婆：咦，你睇吓，张死人台成日岌岌贡，垫咗本都唔够呀，帮我攞多两本嚟吖。
唐伯虎：我幅百鸟朝凰图，因何故冇咗只雀头架?
某老婆：做咩咁劳噪啫?!人哋唔见咗只一索，咪借咗只雀头嚟顶住档先啰。大惊小怪!
唐伯虎：啊～～你你……
(唐伯虎嘅老母朱茜上吊)
唐伯虎：娘亲，你做咩呀?
某老婆：哎呀，奶奶吊颈喇!你哋快啲上去睇吓佢啦!开埋副牌先，双天至尊!通杀!
某老婆：咦，搞错啊!
某老婆：畀钱啦!
唐伯虎：娘亲，你傻咗咩?
朱茜：娘亲冇用咯!同你娶足八个老婆嚟服侍你，你都唔满足，终日愁眉苦脸，我死咗佢好过嘞!
唐伯虎：娘亲呀，你何必噉讲呢?我何曾有怨过你半句得架。
朱茜：伯虎，你正所谓年少有为，事业有成，家财千万，妻妾成箩，你应该系世上最开心嘅人嚟家嘛。
唐伯虎：我冇话过我唔开心 !
朱茜：噉点解你成日黑口黑面?系咪嫌啲家嫂配你唔起吖?
唐伯虎：娘亲你唔明，千金易得，知己难求，我同几位娘子虽有夫妻之名，只可惜同床异梦!
(众老婆一起上吊)
众老婆：你即系嫌弃我哋啫?噉我哋不如死咗佢算嘞!
唐伯虎：哗!八件一齐吊?!何其壮观呀!
朱茜：快救人呀!家嫂，家嫂，你冇事吖嘛?!伯虎，你系咪要搞到尸横遍野，血流成河先至安乐吖?
唐伯虎：我都冇话……
某老婆：放开我……畀我死咗佢算喇……
唐伯虎：喂，你唔好噉啦，你哋!
朱茜：伯虎，你出吓声好唔好?
唐伯虎：唔好嘈喇!(深呼吸)系我错!几位娘子贤良淑德，持家有道，知书识礼，系我唔识欣赏，我对大家唔住，请大家原谅我!
众老婆：你明白就最好啦!
某老婆：相公，笑返吓啦!
某老婆：笑吓啦嘛。
(唐伯虎用手指叉到个嘴好似笑噉)
某老婆：唔～我要笑得开心啲嘅!
某老婆：系咯，笑多啲。
某老婆：咦，你睇个衰样，笑得咁格硬喎。
某老婆：系咪条气唔顺啊?
某老婆：笑劲啲呀。
唐伯虎：啊哈哈，啊哈哈~~~~~~~~~~~~~~~~~~~~
众老婆：财财，两家好，……
朱茜：伯虎，睇吓佢哋几为你吖!以后你就唔好辜负几位家嫂对你嘅一片苦心喇。
仆人：夫人呀，宁王派人嚟要见少爷。
唐伯虎、朱茜：宁王?
朱茜：宁王而家正图谋造反，佢派人嚟，唔通想招揽你?
唐伯虎：哎，点都好，你求其同我打发佢走算。
仆人：请 !
仆人：夫人，佢哋---
使者：哎，唐伯虎呢?我嚟王爷想请佢返去做参谋，快啲叫佢出嚟!
朱茜：几位真系唔好意思，小儿刚患重病，不能见客，宁王好意心领喇，几位请回啦。
使者：哈哈哈哈，又会咁啱嘅?乜王爷请亲嗰啲人都话病咗架?不过王爷早料有此一着，叫我哋带埋御医嚟，等我哋同唐伯虎医病。
朱茜：嗯?!
仆人：夫人……
使者：唐伯虎!(使者等人闯进屋，发现唐伯虎正在大食鸡翼，问对朱茜)哎，你又话佢病咗嘅?!
朱茜：佢……佢系病得好犀利架!
使者：病得咁犀利呀，又会有咁好嘅胃口食鸡翼嘅?
朱茜：系咯，点解呀?
唐伯虎：嗯……好简单啫，因为--- (唱)烧鸡翼，我钟意食 ---
使者：(唱)但系你老母讲你就快钉---
朱茜：(唱)越系快钉之所以越要整多只，如果而家唔食，以后冇机会再食!
使者：(唱)你真系就快钉?!
唐伯虎：(唱)我真系就快钉---
(三人合唱)如果而家唔食，以后冇机会再食!
使者：病到好似唐解元咁好面色都好少有 ，御医，帮唐解元把把脉，睇吓佢有几严重?
御医：唐解元嘅脉象四平八稳，好正常吖!冇咩问题呀!
(唐伯虎用气功改变脉象，御医大惊)
使者：佢点呀?
唐伯虎：有冇得救呀?
御医：试吓啦。
使者：佢做咩呀?
御医：我从来都未听过……咁乱嘅脉象!
使者：你听到啲咩嘢?
御医：将军令呀!
使者：咩话?!
御医：我睇你都系早啲准备身后事罢啦!唐解元，我哋告辞嘞!
使者：唓，早知你噉呀，就唔好嘥我哋啲时间啦!我哋走。
朱茜：御医，你救吓我---
朱茜(望见使者走咗)：衰仔，跪低，你记唔记得你曾经喺你死鬼老窦灵前发过誓，话唔会显露你识武功呢个秘密，点解今日又要破戒吖?
唐伯虎：我记得，但系正话情势危急，况且我只系用内力改变自己嘅脉搏啫。
朱茜：唔怕一万，至怕万一呀，一但畀唐家啲仇人发现你系霸王枪嘅传人，你即刻有杀身之祸架!
唐伯虎：娘亲，我哋唐家嘅仇人究竟系边个?点解你一直都唔肯话我知?
朱茜：哎，我以前唔话你知，系因为你年少气盛，惊你自找麻烦，但你而家都咁大个，我亦唔怕话你知嘞，我哋唐家，系有两大仇口!
(回放)
朱茜：其中一个系夺命书生。当年佢哋二人为咗争夺兵器谱上嘅排名，决定比武，我恐防夺命书生会出诡计暗算你阿爹，所以一直在场监视佢………
(唐天豪与夺命书生大战)
朱茜：等我暗算你个仆街夺命书生先，相公，你赢硬架，放心啦!
唐天豪：高过你!
朱茜：死啦你! (用诡计，误伤唐天豪)
唐天豪：咩嚟架?哎呀，朱茜?!
朱茜：小心呀!
朱茜：死呀?! (用诡计，又误伤唐天豪)
唐天豪：朱茜，你---
朱茜：小心呀!
朱茜：唔得嘞，唯有用绝招啦!死啦!
(撒出许多小珠，却再次误中唐天豪的脸)
唐天豪：哎呀——朱茜，你究竟喺度搞咩家伙呀?
朱茜：我……啊!小心呀!
唐天豪：咪走呀!讲清楚喺度搞咩先呀!
朱茜：我爱你，所有想帮你咋!
唐天豪：帮我咩呀?你撒埋晒啲噉嘅红豆?
朱茜：呢啲唔系红豆!呢啲系我新发明嘅暗器霹雳雷珠!
唐天豪：霹咩雳咩雷咩呀?
朱茜：咦，你唔好睇小佢呀，佢爆起上嚟威力无穷!
唐天豪：威乜叉嘢力咩呀?会爆?
(雷珠爆炸，唐天豪脸被炸肿)
唐天豪：小喇叭，朱茜，你系咪想玩嘢呀你呀?
唐伯虎：啊!书生夺命剑?!
(返回现在)
朱茜：就喺最危急嘅关头，你阿爹突然使出世间上最恐怖最得人惊嘅独门暗器，将整个局面扭转晒。
(又回到回放)
唐天豪：放暗器!(把朱茜扔了出去)
唐天豪：霸王回马枪!(枪头被夺命书生折断)冇枪头嘅?!
(夺命书生一剑刺中天豪)
唐天豪：点解?
(返回现在)
唐伯虎：唔怪得阿爹最后都郁郁而终。
朱茜：你阿爹估唔到夺命书生连精钢制造嘅枪头都可以打断，所以佢喺临死嘅时候，就特别制造咗呢个坚硬无匹嘅寒铁枪头，以防夺命书生赶尽杀绝。
唐伯虎：但系你话我哋有两大仇家，另外一个系边个?
朱茜：另一个就系当年同我争你阿爹嘅情敌喇，不过佢已经嫁咗人，怕且呀都冇乜机会撞到架喇。
唐伯虎：娘亲，呢几日我想离家出外几日暂避风，因为我怕宁王再揾人嚟找我麻烦。
朱茜：最紧要随身带埋支寒铁枪头以防万一呀，记住呀!由于当年你爹打输咗，所以当今兵器谱上便，书生夺命剑排行第二，我哋霸王枪排行第三，小李飞刀紧随第四。
某老婆：(路过)缩开只脚啦!
唐伯虎：噉排名第一嘅系边个呢?
朱茜：佢就系小李飞刀嘅娘亲，可惜已经过咗身呢!
唐伯虎：哦，原来就系小李老母飞刀，真可惜!
某老婆：喂，讲咁多做咩呀?猜两板先啦。(跟伯虎划拳)财财呀!一定中，你顶帽!饮!哎呀，你咁屎， 行开啦，我同奶奶猜呀。(两人猜拳)财财呀，三叉仔呀，九……奶奶你输咗呀，饮!
朱茜：饮咪饮!
众老婆：买大细呀!落落落!买定离手啦!要开啦，开……打你个仆街呀。买定离手……
唐伯虎：(无奈)我个心又悲，个心又痛，八个老婆都沙里弄宠，人家当我享尽齐人福，查实空虚寂寞兼且冻，兼且冻!
(江南四大才子结伴出游)
一女子：睇吓，睇吓，江南四大才子喺嗰边呀。
(众女子兴奋观看)
(四大才子摆POSE，众女子倾倒逃散)
(一女子被四人拦住，被迫跳河)
唐伯虎：想走?飞唔出我五指山嘅。(欲跳下河被拦住)
祝枝山：伯虎兄，好多人呀。
祝枝山：哈哈，我哋今日江南四大才子嚟到游山玩水，唔怪得女子咁疯狂呀。
周文斌：难怪难怪!
文徵明：各位各位，今日大家咁高兴，不如吟吓诗咧?
祝枝山：征明兄好提议。文斌兄先嚟咧。
周文斌：强项啦!山下一群鹅。
文徵明：嘘声赶落河。
祝枝山：噉呀落河捉鹅医肚饿。
唐伯虎：食完返归锄老婆。
三人：哗呀，好句呀!好句呀!绝句!绝句!
唐伯虎：啊哈哈~~~~~~~~~~~~~~~~~~~~~~~~~~~~~~~~`
三人：真系咁好笑?!
文徵明：点解唐兄次次出游都咁豪情奔放呢?
周文斌：乐极忘形，实在令人羡慕羡慕。
祝枝山：讲开又讲喇，喺江南论文章，唐兄才高八斗，论丹青，妙笔生花，呢啲真真正正嘅架势堂啊。
周文斌：冇错呀，更令人羡慕嘅呢就系佢喺音律方面都好高造诣架喇。
唐伯虎：噉呀系呀，古今中外各种乐器我边样唔lun得出神入化。喂，我最近重研究一种西洋嘅敲击乐，很使得。有机会可以同大家一齐研究一下。
周文斌：一定一定!
文徵明：不过计我话唐兄最令人羡慕之处就莫过于艳福喇。系人都知，唐兄家中有八位夫人，个个貌美如花，国色天香。做人做着你噉，夫复何求呢?
祝枝山：羡煞旁人呀。
唐伯虎：啊哈哈~~~~~
祝枝山：有郇嘢“目及” 。
祝枝山：哎，唐兄，你望一望桥头上有个婀娜多姿嘅美女，只影形影单呀。喂，不如噉嘞，你即场示范你嘅沟女大法畀几个兄弟学习学习咧。
唐伯虎：噉呀……
周文斌：啲大朋福利，冇问题吖嘛?!
唐伯虎： 义不容辞吖。
祝枝山：去啦。
唐伯虎： 小姐。
女子：咩事呀公子?(一回头，竟是如花!±#$%×*)
三人(喺远处)：上!上!
唐伯虎：冇，我想借小姐嘅肩膀嚟搭一下，唔知有冇问题呢?
如花：咁点得呀?我系一个黄花闺女嚟家嘛。
唐伯虎：我知，我都系应酬吓啲朋友噉解嘅啫。其实在下正是唐伯虎。
如花： 唐咩伯咩虎，我都唔识你。你再唔走，我嗌架。
唐伯虎：噉咧，我畀一两银你系噉意咧。
如花：一两银?你当我系咩，起码都十两啦!
唐伯虎：哗!你都要十两?!唔好去抢!
如花(掹刀出嚟)：冇错，就系抢!僆仔，攞钱嚟!
(两人乱打)
唐伯虎：你……你……
如花：死喇!
唐伯虎：噍你!
三人：哎?搞咩呢呵?
(三人赶到桥上，最后如花被唐伯虎打落河中)
文徵明：哇，使唔使咁重手呀?!
唐伯虎：抢钱架，呢条死人妖!
三人：吓?!人妖?
祝枝山：我啱呀!你揸住。 (祝枝山将折扇递给文斌，跳入河中)
文徵明：真唔抵!畀佢走先一步!
(华夫人带众人去拜神，气势宏伟)
春香：你睇吓，好多人呀。
夏香：系呀，好热闹啊。
华夫人：春香，夏香，做乜嘢呀?唔好失礼人呀。
(路人均争先恐后的围观)
四大才子：喂，借借!
某人：今日华太夫人带住四香入庙进香啊。
文斌：听讲个个都天仙下凡，尤其个秋香至省镜喎。
唐伯虎： 边个呀?边个系呀?
文斌、文徵明：呢，嗱嗱，嗰边呀!秋香~~~
(秋香回首一笑)
唐伯虎：超，普通料嚟咋 !
文斌：噉呀唔系 ，伯虎兄，须知美女依家嘢呢，同鲜花一样，需要有绿叶嘅衬托至显得出娇媚架。睇多次吖。
文斌、文征明：靓女~~~
(旁人皆成丑女衬托)
唐伯虎：哇!噉睇法真系索到拍拍声 。喂我哋一齐入庙，揾着数咧!
(四大才子装扮成乞丐)
三人：睇你就好喇!
唐伯虎：强项啦。
唐伯虎：阵间一有机会拥埋去大肆搜掠一番呀。
祝枝山：一定啦!
华夫人：施舍啲包畀乞丐食啦。
四香：系，夫人。
(四香施舍乞丐)
唐伯虎：(抱住秋香只脚)救命呀!好肚饿呀!
秋香： 你肚饿呀?噉你食先啦。(递馒头给唐伯虎)做咩呀?一个唔够啊?畀多个你吖。
秋香(继续派包畀其他人)：你哋过嚟吖，呢边重有呀。
(秋香充满爱心。秋香回首对唐伯虎二笑)
唐伯虎：(心语)原来当今世上最美丽嘅笑容，就系充满爱心嘅笑容!我已经揾到我嘅理想，佢就系秋香!
华夫人：秋香，我要入去同呢度嘅主持正一法师倾偈，你去帮我求支平安签返嚟。
秋香：系，夫人。
(秋香跪在地上求签，唐伯虎练练声之后走过去)
唐伯虎：咦，小姐，拜神呀?
(秋香点头)
唐伯虎：好嘅，拜得神多自有神庇佑吖嘛。
(签掉在地上)
唐伯虎：我嚟。
(故意不给秋香，音乐响起，正想唱歌，被一僧人一脚~~~~~~踢到庙门口，僧人拿出一匾，上书“室内严禁喧哗”)
(再进寺内，秋香己走，唐伯虎坐船去追)
唐伯虎：兄弟，即刻同我追华府只官船。
船夫：好呀!好声好声!
船夫：啊，公子呀，你呀真系识货喇，咁多船唔拣你拣着我呢只船，我出咗名够快嘅。
唐伯虎：吓哗?
唐伯虎：喂~~~你只船沉紧喎，你只船!
船夫：系吖，沉得快吖嘛。
唐伯虎：做咩搞啲噉嘅嘢呀?我赶赶时间家嘛，大佬呀!
船夫：睇你嘅样，梗系追秋香姐咧。
唐伯虎：你又知?
船夫：你啲噉嘅富家公子我年中见唔少喇。不过净系喺华府门口啄吓啄吓揾唔到食嘅。
唐伯虎：噉你有咩好桥呢?
船夫：要谂办法混入华府至掂家嘛。
唐伯虎：你过一两条桥过嚟旁吓身好 。
船夫：桥唔系冇，睇你识唔识做。
唐伯虎：挑，点话点好啦。
船夫：噉你听住咯噃~~~~~~~
(两人和船沉入水中)
(华府门前，唐伯虎和船夫推着木车)
唐伯虎：喂，阵间开档架嘞，你死人都唔好喐呀。
船夫：你话将卖到啲钱畀晒我，你唔好老点噃。
唐伯虎：以你嘅智慧，边有人点到你啫?
船夫：噉呀系。
(船夫躺在车上装死)
唐伯虎：喂，明益街坊呀喇，全新第一手好靓嘅孝子大平卖，唔买都嚟睇吓嘞喂!
(秋香和华府婢女石榴姐出门)
唐伯虎：好惨呀，真系。
石榴姐：靓仔呀，你晨早流流喺度卖身葬父，好大吉利是架 。
唐伯虎：唉，我都唔想架。
秋香：点解你咁熟面口嘅，我哋喺边度见过?
石榴姐：系咩?
唐伯虎：所谓相逢何必曾相识呢，不如两位姐姐仔可怜吓我罢啦!
石榴姐：真系惨咯!横掂我哋争个下人，不如就--
(这时又来一个，推着木车，车上六个死人，这人还口吐鲜血，极其悲惨!)
惨人：好惨啊，卖身葬冚家!
唐伯虎：唔系啩?!
惨人： 两位姑娘仔，可怜吓我啦，我冚家六件一晚死晒。我身染十级肺痨，半卖半送，你买我啦。
秋香：石榴呀，睇佢真系惨好多呀，不如都系买佢返华府罢啦。
石榴姐：(哭)噉就买佢啦。
唐伯虎：姐姐，我嚟先架 。
秋香：呢个唔系先后嘅问题吖嘛。
石榴姐：系咯，人哋死六件，你先死得个一件。我都好想帮你，但好难做家嘛。
唐伯虎：但系我都惨架噃?
石榴姐：噉你有咩惨嘅嘢，你晒埋出嚟吖。
唐伯虎：我……我……，你睇我几日冇剪指甲，困晒黑边架喇，唔通噉都重唔够惨咩?
(惨人的小狗突然死去)
惨人：(痛哭)旺财……旺财……旺财你唔好死啊，旺财，你跟我咁耐，对我有情有义，肝胆相照，但系大佬未曾畀过一餐饱饭你食，我对你唔住啊!
(唐伯虎看见一只曱甴，叫“小心呀!”，石榴姐一退，将曱甴踩死咗。)
唐伯虎：(悲痛欲绝)哎呀!小强!小强你点呀小强?小强，你唔好死啊小强!我同你相依为命，同甘共苦咗咁多年，已经当你系我亲生骨肉噉攻书教学，估唔到今日，白头人送黑头人!
石榴姐：秋香姐，佢两个都咁惨，噉点呀?
秋香：睇定啲先。
石榴姐：哦。
惨人：吆!(走到唐伯虎跟前，两人对峙)阿哥，你等阵先。你睇吓你身光颈靓，返去化过妆先啦。你睇吓我，奀挑鬼命，满手毒疮，你够我惨唔够呀?
唐伯虎：喂，兄弟唔好大我，我份人唔大得架 !
惨人：大你咪大你啰?
唐伯虎：你家吓迫我吓哗，你家吓?
惨人：系惨过你呀?吹咩?
唐伯虎：吆!(拾起一根棍，将自己的胳膊打断)仆街啦!哎呀。唔好话你满手毒疮，家吓成只手断埋，睇吓边个惨吖!
惨人：你使唔使玩到咁尽呀?!
唐伯虎：直情系晒你冷架，吹咩?
惨人：我跟你个晒冷!仆你个街啦!(拿棍子砸破自己的头，血流如注)哎呀!哈哈，同我玩嘢?我而家命都唔要，睇你点大我!边-个-够-我-惨-呀?!(倒地身亡)
唐伯虎：僆仔，你好嘢，山水有相逢呀!
石榴姐：喂喂喂，佢而家死咗，我买你吖!
唐伯虎：系?
石榴姐：系!
唐伯虎：噉要加多五两银。
石榴姐：哗，你坐地价都有嘅?!
唐伯虎：冇，我想葬埋呢位仁兄啫。
石榴姐： 真系好人喇，就买佢啦。(拿出银子)
秋香：哎，石榴，你话买就买架喇!返入去问吓夫人先再算啦。你听日再嚟过吖。
石榴姐：我去问喇。
唐伯虎：秋香姐，辛苦晒你!
(秋香进门时回首对唐伯虎三笑)
唐伯虎：哗，噉笑法摆明系挑逗吖。阿妈!我得咗嘞~
(第二天，华府内)
管家：念在你一片孝心，就买你入嚟华府做下人啦，为期两年，有冇问题?
唐伯虎：冇问题!
管家：噉呀签咗份契约先啦。
唐伯虎：签紧!(唐伯虎自己立下了卖身契约)
(唐伯虎身穿下人服装，兴奋的去华府院内开工)
(“武状元到!”“重唔踎低!”一下人将唐伯虎按下蹲在地上，双手放在脑后)
武状元：新仔，由今日开始，你就系华府嘅低等下人，9527就系你终身号码。开始做嘢!
众下人：(列队跑步，唱行军歌)死做烂做似条鸡……
武状元：被人闹重要开口笑，似只鸡，好好笑。
众下人：被人闹重笑笑口，似只鸡，好好笑。
(四香路过窃笑这些下人，唐伯虎盯着秋香看，无意撞到了武状元，被罚做俯卧撑)
武状元：(计数)1001，1002，1003，1004……，睇你做到噉嘅衰样，趌高箩柚，再嚟过!(踢唐伯虎) 1，2……
(唐伯虎烧鸡时，偷画秋香画像)
武状元：爽手呀!烧靓啲呀，左髀通通留畀我!
(开饭唐伯虎没抢到饭。扫狗屎被弄一狗屎。)
(四香在放风筝。)
唐伯虎(谂)：机会嚟嘞。(用瓦片将风筝线打断，风筝落在屋顶)
四香：哎呀，断咗线喇，噉点算啊?
唐伯虎：几位姐姐，发生咩事干呀?
夏香：9527，快啲同我哋攞返只纸鹞落嚟吖!
唐伯虎：但我作为一个低等嘅下人，唔方便入嚟嘅。
夏香：边个话当你系低等下人啫?我只系当你系只狗咋。
唐伯虎：啊?!
冬香：哎呀，叫你去攞你就去攞啦。
冬香：就喺上便呀。
唐伯虎：秋香姐，幸会幸会。上次到而家我都重未曾有机会多谢你添。好在有缘千里能相会，你只纸鹞包在我身上。
春香：咁多嘢讲!去执啦!
唐伯虎：系嘅系嘅。(爬上屋顶，攞到纸鹞)
四香：9527，小心啲呀!
唐伯虎：多谢关心呀，秋香姐……(脚下一滑，掉在地上)
秋香：(扶起唐伯虎，关心)9527，你点呀?你冇嘢吖嘛?
唐伯虎：我冇嘢，只系断咗只手啫。
秋香：点解咁唔小心呀?
唐伯虎：只要能够同你执返只纸鹞，我不怕千刀万斩，甘愿勇闯地狱，家吓区区一条手臂，何足挂齿呢?
秋香：我怪错咗你嘞，对唔住。
唐伯虎：嗱，我唔准你噉讲呀，人谁无过得架?
(两人含情相忘，欲亲吻)
秋香：唔得，唔得架!
唐伯虎：噉算嘞。
秋香：唔好走啊。
(两人拥抱亲吻)
三香：(鼓掌)好咯，有情人终成眷属咯!
(屋顶上唐伯虎哈哈大笑，笑得满头大汗，原来刚才那一幕是唐伯虎的幻想)
冬香：佢喺上边笑咩呀?
秋香：我睇吓你喺度搞乜鬼!
春香：9527，你做咩呀?快啲落嚟呀!
唐伯虎：嚟紧。(假装脚下一滑，向地下落去)(暗想)秋香，我嚟嘞!
(刚要落地，却被武状元接住，抱在怀中)
武状元：僆仔!我收到风你偷偷地画佢个样，系唔系?
唐伯虎：细佬生平画过唔少画，唔知你指边幅呢?
武状元：(从唐伯虎衣内拿出唐偷画的秋香画像)大家睇吓佢画啲乜嘢?
武状元：你居然将我风华绝代婀娜多姿美丽动人嘅石榴姐画到噉嘅衰样!
唐伯虎：对唔住，我学吓嘢噉解嘅啫，畀返我先。
武状元：呸!你冇天份就唔好画!(撕画)重学人画嘢!我冇办法唔畀你开吓眼界嘞，学嘢啦!(掏出自己画的画)呢啲先叫画!
唐伯虎：哼!真系强中自有强中手，一山还有一山高，小弟甘拜下风!(吐)
武状元：嚟~~~，大家鉴赏一下。
(众下人鼓掌，吐)
武状元：你而家知道咩叫画啦。你唔单止偷懒，重同我争女!(命令众下人)噍佢!
(唐伯虎被一顿痛扁)
秋香：你哋唔好打呀。再唔停手我就话畀夫人知。
武状元：哎，停手!我畀面秋香姐，我哋走!(众人离去)
秋香：喂，你死得未呀?
唐伯虎：未，我一日未将只纸鹞亲手交畀秋香姐你，一日都唔可以死。秋香姐--(纸鹞己折断)
秋香：哼!我哋走。
春香：冇咁容易，累我哋冇得玩纸鹞，打佢!
(又挨一顿痛扁)
唐伯虎：好在我拼命噉蒙住块面，噉我英俊嘅相貌亦得以保存，今晚就揾机会向佢嚟表白，看你个秋香对我动情不动情!
(一转身，右眼挨了一拳)
唐伯虎：边个打我?
石榴姐：系我风华绝代，万人惊艳嘅石榴。
唐伯虎：系你?我同你无冤无仇……
石榴姐：我打!(唐伯虎又中一拳，鼻血流下)
唐伯虎：点解?
石榴姐：点解?!因为你抵打!你偷画我暗恋我嘅事，而家系人都知啦，我重边有面目见人啫?我死咗佢罢啦!
唐伯虎：都好嘅。
石榴姐：你就梗系好定嘞，你想同我一齐死，做对同命嘅鸳鸯?呸!我都冇话接受你嘅爱。
唐伯虎：石榴姐你误会嘞，其实我对你就如同对我自己亲生阿妈一样咁尊重。
石榴姐： 阿妈?!你居然爱上自己个阿妈?!天呀，呢种大逆不道，丧尽天良嘅事，实在太刺激嘞!未试过架，我有少少紧张呀，嚟吖!快啲呀!
唐伯虎：哎!石榴姐你癫咗咩你而家?!
石榴姐： (仰面躺在地上)咪再多讲啦，做啦!唔好因为我系娇花而擏住我，出力呀!
淫贼之一：(一脚踩在石榴姐脸上)一嚟就整件咁丑样嘅，真唔老利!
唐伯虎：跩得好!
(墙上又跳下三人，将唐伯虎抓住)
淫贼之一：大佬，久闻春，夏，秋，冬四香个个都貌美如花，尤其系嗰个秋香添简直靓到攞胆呀。
淫贼之二：秋香梗系益大佬啦。
东淫：噉呀当然啦。
淫贼之一：大佬呀，呢个点呀?杀咗佢呀?
东淫：哎~~，呢对狗男女都可算系同道中人，打晕佢算啦。
淫贼之一：好啊。
唐伯虎：哎~~，四位莫非就系名震江南嘅四大淫侠?!
四淫贼：冇错，(POSE)我哋就系东淫西贱南咸北湿!
唐伯虎：哇呀呀呀呀~~~~~~~~，好!实不相瞒，其实小弟我亦系人称玉树临风胜潘安，一树李花压海棠嘅小周伯通!
淫贼之一：未听过喎!
东淫：哎~~~呢位小兄弟呀，佢连咁“jaap”佢都肯上，小呢个称号真系当之无愧呀。
唐伯虎：呢啲小意思啫，再“jaap”啲我都试过!
东淫：哗?!我真系再嗌你一声大佬呀!
唐伯虎：不敢当，不敢当!正话我听几位讲，话想入去咸湿吓个秋香?
东淫：噉呀系吖。
唐伯虎：唔嫌弃等我嚟带路咧。
东淫：啊~~~~，你想执二摊呀?!噉你排第一啦!
唐伯虎：多谢多谢!
大话周 星驰站 zho uxingchi.cn
东淫：(四人从石榴姐身上踩过)抹干净鞋底，唔好留低脚印!
(唐伯虎带四人绕来绕去，将四人甩开)
四淫贼：咦，点解兜吓兜吓唔见咗个小嘅?快啲揾佢返嚟带路!
唐伯虎：(找到秋香的房间)揾到嘞。(进入房间)
唐伯虎：嘘~~~
秋香：9527，你入嚟做咩呀?
唐伯虎：不得了嘞秋香姐，出便有几个淫贼想嚟咸湿你!
秋香：(不以为然)哦，我真系好惊呀，噉而家点算好呀?
唐伯虎：好彩我已经暂时引开咗佢哋，华府咁大，要揾到嚟都唔系咁容易!不如--
秋香：点解你流紧鼻血嘅?
唐伯虎：就系畀嗰几个淫贼打伤架。但系呢小意思嚟啫!为咗救秋香姐你，我死又何妨呢?你而家嗱嗱声跟我去一笪冇人嘅地方匿埋再算。以防万一，等我出去睇睇先!
(秋香伸脚将唐伯虎绊倒，有流很多鼻血)
唐伯虎：唔紧要，唔紧要，我冇事。
秋香：企喺度!你自己咪就系嗰个淫贼啰。
唐伯虎： 严格嚟讲我都系贼，不过唔系淫贼，你可以称我为一个偷心嘅贼!
秋香：我唔理你系咩贼，请你唔好再喺我面前整古做怪，只会令我更加讨厌你!
唐伯虎：秋香姐，当你发觉你冤捩紧我嘅时候，一定会好伤心，好后悔，噉又何苦呢?都系快啲跟我走!
秋香：缩开!如果真系有贼嘅，点解唔话畀夫人知，偷入嚟我房做咩呀?!你咪恃住读过两年书，就周围轻薄啲无知女子。我话畀你听，男人穷唔紧要，最紧要有骨气，有才学，好似你呢庭人就算读死一世书只不过系废物!
唐伯虎：讲得好!我作为一个男子汉听到呢番对白好应该打到你爆缸，但系我唔会噉做，可能你讲得啱，我真系一个废物都未……
秋香：你真系废物都不如，应该叫你做狗贼!
唐伯虎：互，好一句狗贼，睇嚟你真系好憎我，既然系噉，秋香姐何苦对我三笑留情?
秋香：(嗤笑)有咩?!我会对你笑咩?!
唐伯虎：嗱，又嚟嘞!
秋香：就算真系对你笑，都系笑你系个白痴咋!
唐伯虎：原来落花有意随流水，而流水无心恋落花。对唔住，系我自作多情。但出便真系好危险，你自己千万要小心!
(转身撞在门柱上)
秋香：点解呢个世界咁多无聊嘅废物!唔通只有唐伯虎至称得上为男子汉?!只有真正嘅男人先能够写出咁靓嘅诗句。“桃花坞里桃花庵，桃花庵下桃花仙。桃花仙人种桃树，又摘桃花换酒钱。”
唐伯虎：(才子模样，站到桌上)“别人笑我太疯癫，我笑他人看不穿。不见五陵豪杰墓，无花无酒锄作田。”
(秋香与才子模样的`唐伯虎含情相忘)
唐伯虎：果然系好诗!
(秋香一眨眼，发现还是华安)
秋香：企到咁高做咩呀你?唐伯虎嘅诗由你把口读出嚟，简直系一种侮辱!你冇资格读佢嘅诗，你即刻同我躝!(开门)
唐伯虎：(一把抓住秋香的手)小心!出便危险呀!
唐伯虎：(搂着秋香的腰)秋香，我总算明白你嘅心意。
秋香：(挣脱)放肆，你实在太过分嘞，你再唔出去，我就唔客气吓!(拿出一根棍)唔好迫我出绝招呀!
唐伯虎：(笑)秋香，你实在太冲动嘞，但好难怪，你年纪重细，但我真系好喜欢--
秋香：十字追魂棍!(举棍欲打)
唐伯虎：事到如今，冇办法再隐瞒，你听清楚，其实我就系唐--伯--虎!(棍到跟前陡然停住)
秋香：唐伯虎?!
唐伯虎：(POSE)点睇?!
秋香：你系唐伯虎我就系观世音啊攞你命!
(秋香变出一根更粗的棍了将唐伯虎打出门外，门外四大淫贼刚赶到，唐伯虎摔倒压在东淫身上)
东淫：哎呀，咁大力飞落嚟嘅?你个小，简直系大咸湿啊!
淫贼之一：醒醒呀大佬。
秋香：大佬?!捉贼呀!捉贼呀!有贼呀!捉贼呀!捉贼呀!放开我呀!放开我呀!放开我呀!救命呀!放手呀!
(唐伯虎口吐白沫，己被打晕。四淫贼将秋香劫走。秋香在房内读的书《唐寅诗集》掉在地上。)
武状元：(拦住四贼)咪喐!举手投降!
一淫贼：吃屎啦!
(四人与武状元大战)
一仆人：唔好畀佢哋走，通知夫人。
(华夫人出现)
华夫人：嚟吖!
(华夫人用武功轻易将四贼擒住)
华夫人：武状元，呢几个贼系点入嚟嘅?
武状元：夫人……
秋香：夫人嗱，我见到9527同呢几个人一齐架。
唐伯虎：啊?!
华夫人：日防夜防，家贼难防!将佢哋一干人等，送官治理!
唐伯虎：冤枉呀，夫人!
一下人：夫人嗱，我头先喺地下执到本书 。
(原来正是秋香丢的《唐寅诗集》)
华夫人：混账!呢本《唐寅诗集》系边个嘅?我讲过好多次，华府之内绝唔允许有唐伯虎嘅物件出现嘅!呢本书到底系边个嘅?快啲自己招认咯 !秋香，系边个嘅?
秋香：(色变)夫人……我……
华夫人：快啲讲!
唐伯虎： 夫人，细佬知道系边个嘅。
华夫人：讲呀!
唐伯虎：系细佬嘅，要惩罚请你惩罚埋细佬。
华夫人：武状元!
武状元：系!夫人!(伸手向唐伯虎)攞你细佬出嚟!
唐伯虎：夫人，细佬嘅意思正是小弟。
华夫人：既然系噉，好，拉佢出去斩成肉浆，喂狗!
唐伯虎：夫人，唔好呀!实情我只系想引开啲贼，嚟救阿秋香嘅啫。
秋香：夫人--
华夫人：我唔理你同嗰几个贼有咩关系，身藏《唐寅诗集》已经系死罪，拖佢出去!
唐伯虎： 夫人，请听我解释啊。
华夫人：重有咩好解释呀?
唐伯虎：(筷子敲碗伴奏)禀夫人，小人本住在苏州嘅城边，家中有屋又有田，生活乐无边。点知个唐伯虎，佢横蛮不检点，勾结官府目无天，巧取豪夺我家田。我阿爷同佢反面，惨被佢一棍来打扁，我阿嫲闹佢欺善，更被佢捉了去唐府，强暴了一百遍，一百遍，最后重悬梁自杀惨无边。佢还将我父子，逐出了家园，流落到江边。我为求养老父，只有独自行乞在庙前。点知个唐伯虎，佢实在太阴险，知道此情形，竟派人来暗算，把我父子狂殴在市前，小人身壮健，残命得留存，可怜老父佢魂归天!此恨更难填。为求葬老父，唯有卖身为奴咁作贱，一面勤赚钱，我一面读书篇，发誓把功名显，手刃仇人意志坚!从此唐寅诗集伴身边，我永记此仇不共戴天!!!
(唐伯虎用蜡烛作鼓棒，木凳作鼓，来了一段刺激的打击乐，众人皆陶醉)
华夫人：(内心独白)实在太刺激嘞，我真系忍不住要赞佢!唔得，我唔可以表露出嚟嘅。但系呢种感觉真系令人有如腾云驾雾一样，他咁感人肺俯嘅自白，居然用到调皮鬼马嘅数板形式嚟表达，再加上节奏感强劲嘅敲击乐作为结尾，真系听到我高潮一浪接一浪呀!
某香：(心)系呀，佢嗰种汹涌澎湃嘅创作力，就好似多春鱼体内嘅春一样，成千上万，源源不绝啊!
某香：(心)冇错，我就系嗰条多春鱼，我而家充满力量喇!
三香：(心)多谢你呀，9527!
武状元：重未够感人，睇我表演吖你哋。点解食完饭，一定要屙屎，屙完屎重系要擦，惨————!
(华夫人及三香一惊，从幻想回到现实)
华人人：哦，原来你同唐伯虎都有不共戴天之仇嘅。
唐伯虎：系呀，夫人。
秋香：夫人呀，呢个奴才虽则系贪生怕死，但亦非一无是处，我见佢出口成文，似乎都读过几年书吖。如今书房正欠一个伴读书僮，何不要佢带罪立功，陪伴两位公子读书噉咪重好?
华夫人：既然秋香为你求情，就免你一死。从今日开始，我就赐你嘅名叫华--胜啦!
唐伯虎：啊?!夫人，呢个名我恐防受唔得起 。
华夫人：噉呀?噉就叫华安喇。
唐伯虎：谢夫人!
(公子书房)
华文：我系都要秋香帮我磨墨架喇。
华武：你系唔系系都要同我争秋香先?!
华文：我系大佬，梗系我架喇!
华武：沟女有分大细嘅咩?!
华文：你系都要同我捻呀?!
华武：捻咪捻啰。
华文：顶你个肺!(将一个毛笔插入华武鼻孔内)
华武：你插细佬?!仆你个街啦!
华文：哎呀!大佬你都插?!同你死过!
(两人打)
华文：为咗秋香，兄弟都冇情讲!
(唐伯虎推门进来，将两位公子挤在门后)
唐伯虎：顺利过关成为书童，一切都尽在我掌握中，越嚟越接近秋香姐，今日嘅心情就确系唔同，就确系唔同唔同!哎?两位公子呢?!
华文、武(被毛笔插咗入口)：你条契弟系边个呀?
唐伯虎：我系负责嚟陪两位读书嘅书僮啫。
华武：哦!就系寻晚拍台拍凳嘈住我哋瞓觉嗰个粉肠呀?!
唐伯虎：正是!咦~~~~~两位公子骨胳精奇，能够服侍两位真系万幸!
华文：嗯~~~你呢句说话都几啱听，以后就当你系人噉看待啦。
华武：去斟茶!
唐伯虎：对唔住，细佬有三不做嘅。
华武：咩三不做呀?
唐伯虎：我一不斟茶递水，二不洗衫扫地，三不铺床摺被!
华武：(对华文说)噉即系同我哋一样 !
华文：噉你识做啲咩呀?
唐伯虎：我晓--，嗨嗨~~~~吹口琴，lun玉箫，炒碟靓蚬，焗个蛋挞，占卜星相就观人宇眉，风流自命，窃玉偷香!
华武：真唔真呀?
华文：畀啲本事睇吓咧。
唐伯虎：喺呢度……恐防不便示范 。
华文：想缩沙呀?话咗你作大嘅呢。
华武：有本事就睇吓我哋两个!
唐伯虎：嗯……
华文：挑!答唔出咧?!
唐伯虎：(拍桌而起)若然我冇睇错，两位应该系--低能嘅!
华文：噉都畀你睇得出?!
华武：我真系佩服到五体投地呀!
华文、武：容许畀我哋叫你一声大佬嘛?
唐伯虎：呣~~~叫唔叫唔相干喇，以后你同我斟茶递水，洗衣摺被就够嘞。
(先生推门进入)
先生：嗳?华文，华武，你两个跪在地上所因何事呀?
华文华武：我哋拜大佬呀!
先生：区区一个书僮何德何能做人大佬呀?
唐伯虎：在下无德无能，只系开吓玩笑，望老师见谅!
华文华武：唔系呀，华安，我哋跟硬你架喇!
先生：年轻人，你够胆撬我啲僆，你边度架?
唐伯虎：未请教---
先生：教上教。
唐伯虎：先请而后教。
先生：后教而先请。
唐伯虎：先请而先教。
先生：后教而后请。
唐伯虎：再请我就教。
先生：你企稳呀喇!我本身原藉四水，现为华府首籍西宾，手执一把扇!你系咩部门架?
唐伯虎：我原籍苏州，现任华府一件迷途小书童，门前一对双花齐眉棍!
先生：呸!你大我呀?(老先生脱去上衣，露出纹身)
众人：哗!
先生：我左边龙，右边虎，老牛在腰间，龙头在心口，人挡杀人，佛挡杀佛!
(先生从腰间抽出一把砍刀，跃到门后)
华太师：华文，华武!(华老爷推门而入，正好将教书先生杀死)老师，你做咩呀?(问华文、武)喂，点解老师噉嘅?
华文：阿爹，刚才你唔觉意怼冧咗老师呀!
华武：恭喜阿爹你杀咗人呀。
唐伯虎：非也，非也!刚才我见到老师玩紧“神打上身”，以为刀枪不入，点知标唔到童，入咗!啱唔啱听呀，太师?
华太师：系!啱听，事实系噉吖嘛。人嚟，抬老师出去!哎，你系边个呀?
华文：佢叫华安，陪我哋读书嘅。
华武：系呀，阿爹。
华太师：华安，你讲得好，立咗大功。
唐伯虎：小意思啫。
华太师：我决定升你做高级伴读书僮!以后负责教导佢两个读书，知道嘛?
唐伯虎：谢太师!
(华安升职。华安和四香关系融恰……)
(三香吵着要华安吟诗)
三香：华安，吟啦。系啰，吟啦。耶，好似嗰晚嗰啲噉呢。嚟呀。吟啦。
华安：嗱，噉听住咯噃。
三香：好呀!好呀!
华安：一个华安两只眼，三个姑娘六只奶。
三香：啊!咦!
(三人娇嗔跑开，碰见秋香)
秋香：做咩呀?
一香：华安讲衰嘢呀!
一香：系呀!
唐伯虎：秋香姐。
秋香：华安呀，你又喺度整蛊人啦?
唐伯虎：冇啊，我念诗之嘛。
秋香：念咩诗呀?念唐伯虎嘅诗?
唐伯虎：当然唔会啦，唐伯虎同我咁大嘅仇口。
秋香：你唔使乱讲，你呃到夫人呃唔到我嘅。不过，嗰个故仔你都改得几精彩吖。
唐伯虎：秋香姐果然冰雪聪明，细佬佩服。
秋香：噉嗰晚点解要喺我间房冒认系唐伯虎吖?
唐伯虎：嗯，你估吓。(转身走开)
秋香：(追上)喂，你估我唔知呀，你一定系识得唐伯虎嘅?!
唐伯虎：当然识架。
秋香：噉可唔可以介绍畀我识啫?
唐伯虎：我咪系!
秋香：哎呀，你唔好喺度讲笑啦，我系认真架。
唐伯虎：唉，人称诗画双绝，风流不羁嘅唐伯虎系人都识架啦，之不过佢唔识我啫，哼哼哼~~~~~
秋香：我话你讲得唔啱!风流不羁只系佢嘅表面，我读过佢嘅诗，喺字里行间，睇得出……佢系一个用情专一，真情真义嘅男子汉。(唐伯虎感动)喂，你做咩呀?
唐伯虎：我感动到有点想喊。你嘅观察力真系惊天地，泣鬼神。如果唐伯虎能够有你你个红颜知已，真系死而无憾!
秋香：你呃人吖你!
唐伯虎：秋香姐!噉你觉得我呢个华安嘅人品又点啫?
秋香：我觉得你--系一个傻瓜啰!
唐伯虎：秋香姐!噉你愿唔愿意同一个傻瓜，喺今晚三更时分，柳树之前，一齐研究诗词歌赋呢你估?
秋香：(沉思片该)好呀!
唐伯虎：多谢!
秋香：唔使客气。
三香：扑街喇!
夏香：秋香姐，唐伯虎畀武状元捉咗返嚟呀!
唐伯虎，秋香：啊?!
(华府客厅内)
祝枝山：救命啊!
武状元：收声!
祝枝山：收咩声呀?
武状元：夫人，我喺苏州市集见到呢个人自认系唐伯虎，重揸住啲字画喺度卖，我攞返嚟畀夫人睇睇。
华夫人：(看画)嗯?!果然系唐伯虎嘅手笔。
祝枝山：冤枉呀!我都话唔系唐伯虎咯。
华夫人：如果你唔系唐伯虎，点解有咁多佢嘅画呢?
祝枝山：我趁唐伯虎唔喺屋企嗰阵，挞嘅啰。
华夫人：你口口声声话自己唔系唐伯虎，噉你系边个呀?
祝枝山：我系江南四大才子之一祝枝山，如假包换!
华夫人：你唔肯认呀?!好，冬香，带华安出嚟，等佢当面认下，佢不共戴天嘅仇人唐伯虎。
冬香：系，夫人。
祝枝山：华安?!
(唐伯虎以扇遮面)
唐伯虎：夫人。
华夫人：做咩呀?
唐伯虎：冇，琴日我讲得嘢多，肌肉抽筋啫。
华夫人：你埋去认吓佢，系咪你嘅仇人唐伯虎。
唐伯虎：系。
(唐伯虎走到祝枝山面前，将扇拿开，脸上贴满了膏药)
祝枝山：哦，原来系你!
唐伯虎：超!你噉都认得?
祝枝山：唓!你化灰都认得你啦，你就系唐……
唐伯虎： (打断祝)冇错!我就系唐伯虎千方百计要迫害嘅死剩种。(凑过去悄悄对祝说)嗱，唔想死好收声吓。夫人，因为唐伯虎佢每次行凶都蒙住面纱，所以小人都唔敢肯定佢系唔系。
华夫人：噉呀，噉就宁枉毋纵，杀咗佢啦!
唐伯虎：啊，咪住!呢个人就算唔系唐伯虎都应该同唐伯虎有莫大嘅关连，所以留返条命喺度应该有用嘅。
华夫人：嗯，死罪可免，活罪难饶。石榴，你带佢入柴房好好看管，任你处置!
石榴姐：谢夫人赏赐!
祝枝山：喂，你想点呀?
石榴姐：带佢入去。
祝枝山：喂喂喂，唔好搞呀，我系男仔嚟架喇。
(石榴姐心满意足从柴房出来。唐伯虎攞住刀偷偷入柴房。)
祝枝山：啊，喂，唐兄唔系要杀人灭口吓嘛?!
唐伯虎：收声啦，而家我静静鸡放你走，速勐吖。
祝枝山：喂，唔好呀，华府好食好住，况且我啱啱上咗件怨妇嘅极品，我唔舍得走呀。
唐伯虎：你唔系讲笑吓哗?
祝枝山：真架咧!况且我喺出便争到成身债，呢度系最好嘅避难之处啦。
唐伯虎：你--(外面脚步声)有人!(躲到柴堆内。进来的是秋香)
秋香：你冇事吖嘛?
祝枝山：咩事呀?秋香姐。
秋香：请问，你系咪真系唐伯虎呀?
祝枝山：姑娘为何有此一问呢?
秋香：实不相瞒吖，我好倾慕唐伯虎嘅才华同文采，我好想见一见佢真人呀，你话畀我听你系咪吖?
祝枝山：冇错，我就系唐伯虎。
(唐伯虎一惊，发出声音)
秋香：啊?!点解有声嘅?
祝枝山：畜生嚟嘅啫。
(唐伯虎又惊叫一声，秋香听到都吓到惊叫一声)
祝枝山：畜生咪嘈!秋香姐，今日我有缘相会，应该可以促膝长谈。(拉秋香的手，秋香害羞闪开)
秋香：唐公子，我可唔可以问你一个问题呀?
祝枝山：当然可以。不过为咗表达你嘅诚意，你先答我一个问题。
秋香：嗯。
祝枝山：首先，咪埋双眼，全身放松，慢慢将你嘅头放喺我左肩膊上。
秋香：嗯?!
祝枝山：哎，唔好紧张，你唔相信我咩?尽量唔好紧张，慢慢将个面挨埋嚟……啱嘞!乖吓!
唐伯虎：忍无可忍!
石榴姐：靓仔!我嚟嘞!
秋香：有人呀!(也躲到柴堆中后)
(石榴姐奇装异服，大跳艳舞)
祝枝山：小姐，边位?
石榴姐：咩呀?噍完家吓想扮唔认得噉话啰 ?吓?!
祝枝山：我唐伯虎一介斯文人，你讲乜嘢?
石榴姐：妖!你正话扯到咁尽，吓?
祝枝山：喂，头先冇人就扯到尽啫，而家有……(突然意识到自己说漏嘴了)
石榴姐：有咩啫?呢一剂要同你玩返一铺，美女与野兽!
秋香：原来唐伯虎系个噉嘅人，华安都比佢好得多!
唐伯虎：(突然出现)过奖嘞秋香姐。
秋香：啊?!你点会喺度架?
唐伯虎：我?我嚟(目及)嘢嘅啫，你呢?
秋香：我都系呀。
唐伯虎：哦。噉一齐吖。
(祝枝山和石榴姐嗯啊声不绝)
唐伯虎：哗，呢招精彩呀!
秋香：睇睇?
祝枝山：哇!老虎唔发威，你当我冇到?
石榴姐：醒多剂吖!
祝枝山：多多都有呀!
(宁王带大批人马来到华府)
武状元：太师，宁王带住大队人马入紧嚟呀!
华夫人：老爷，呢个宁王一向同老爷政见不合，喺朝廷大家都水火不容，今日贸然到府，重带咗咁多官兵，恐防另有所谋，我哋因住佢借啲意发烂 !
下人：宁王到!
宁王：哈哈~~~~~~~~~~~~华太师你好嘛?
华太师：哈哈~~~~~~~皇爷远道光临寒舍，我真系受宠若惊嘞。
宁王：嗳，太师言重喇!我素闻太师你对丹青有所偏好，我非常辛苦先至揾到唐伯虎嘅几张真迹专程送畀你呀。
华太师：王爷……
宁王：唔使罗嗦，师爷，攞画嚟。
师爷：系。
华太师：啊，果然栩栩如生，活灵活现 。
宁王：哈哈，系唔系呀?!我最喜欢佢有王者风范，我揾人重新装裱架。你睇，嗰种令群鸟低头嘅气势，跃然于纸上，真系不愧鸟中之王呀!哈哈~~~~~~~~~~
华太师：嘿嘿，王爷，咁贵重嘅礼物，我点受得起呀?
宁王：嗯?!噉即系唔畀面啫，系咪想迫我发烂渣?!
华夫人：哎，王爷息怒，既然王爷今日有图而来，贱妾都好想开吓眼界。
宁王：好!既然华夫人都系爱画之人，大家一齐研究吓!
华夫人：秋香，你都嚟睇吓。
秋香：系，夫人。(看画)呢幅孔雀图，论画本身的确系唐寅少有嘅妙笔之作，可惜孔雀始终系凡鸟，就算重新装裱嚟衬托，亦都系无补于事。凡鸟就系凡鸟，断唔会飞上枝头变凤凰嘅!
华夫人：王爷，贱妾管教无方，如果秋香讲得有咩唔啱嘅，请王爷恕罪。
师爷：哼!王爷，夫人噉讲，佢哋一定收藏咗比我哋呢幅更好嘅唐寅作品!
宁王：系 !夫人，噉就要攞出嚟畀我见识见识嘞!
华夫人：实不相瞒，我哋真系冇唐伯虎嘅画。
师爷：(指着华太师)岂有此理!你即系存心戏弄王爷!
宁王：华太师!
华夫人：哎，王爷，画就冇嘞，不过唐伯虎本人呢，正在喺舍下做客。秋香，去请唐伯虎出嚟。
秋香：系，夫人。
秋香：(将祝枝山带到)夫人，唐伯虎到。
华夫人：唐伯虎，我要你即即挥毫，画一幅凤凰傲意图畀王爷欣赏吓。
宁王：好!我要睇吓你点样画神鸟凤凰，好过我幅孔雀!如果你画得唔好，你小命不保呀!
华夫人：唐伯虎，你重唔快啲画?!
祝枝山：啊啊呀呀~~~~~~~~~~~(挥笔几下画好)大功告成!(太师、宁王等人围上观看)嗱，呢只神鸟凤凰呀!
参谋将军：唔系吓哗?!分明就系鸡仔啄米图呀真。
祝枝山：啊~~~~~，争少少。(又在那张奇丑的小鸡头上加了个圈)喺个头度加个光圈，嘻嘻，噉咪神鸟啰!
宁王：岂有此理，居然敢戏弄本王!
华夫人：(用桌子将祝枝山打倒在地，口吐白沫，不省人事)多谢王爷，我一直怀疑呢个人系假架，今乜喺王爷威严之下，果然露出马脚?抬佢出去!
下人：系!
宁 王：素闻太师才高八斗，我有一个参谋将军想同你切磋切磋喎!
华夫人：我哋老爷点可以以大欺小呢?
华太师：系咯，系咯!
参谋：文学切磋嘅嘢冇分辈份嘅!
宁王：系咯，玩吓啫!不过如果你对唔到嘅，唔好怪我发烂渣喎!出对!
参谋：一乡二里共三夫子不识四书五经六义竟敢教七八九子十分大胆!
宁王：对啦，做咩唔对呀，咁唔畀面?我真系发烂渣架喇!
唐伯虎：畀我试吓咧!
唐伯虎：十室九贫凑得八两七钱六分五毫四厘由且三心两意一等下流!
参谋：好工整 !
华太师：哈哈哈，华安，你真系嚟得好及时呀!
唐伯虎：冇事，冇事!
宁王：嗯!
参谋：在下七省文状元兼参谋将军，绰号“对王之王”嘅对穿祥，未请教?
唐伯虎：细佬读过两年书，尘世中一件迷途小书僮，华安!
参谋：好，等我嚟会一会你!(两人对立许久，相互一个飞吻，众人皆倒)
唐伯虎：对唔住，我哋大家惺惺相惜，情不自禁啫。
参谋：言归正传，我哋开始嘞!
参谋：画图里，龙不吟虎不啸，小小书僮可笑可笑!
唐伯虎：棋盘内，车无轮马无缰，叫声将军提防提防!
众人：好!好嘢!好嘢!
参谋：莺莺燕燕翠翠红红处处融融洽洽!
唐伯虎：雨雨风风花花叶叶年年暮暮朝朝!
华太师：华安真系叻仔，叻仔!
宁王：快啲出对冧佢!对呀!对呀!
参谋：十口心思，思君思国思社稷!
唐伯虎：八目尚赏，赏花赏月赏秋香!
(众人鼓掌)
参谋：我上等威风，显现一身虎胆。
唐伯虎：你下流贱格，露出半个。
参谋：我堂堂参谋将军会输畀你个书僮?
参谋：冚家铲泥齐种树!
唐伯虎：汝家池塘多交鱼!
参谋：鱼肥果熟嫲捻饭!
唐伯虎：你老母兮亲下厨!
参谋：啊?!(参谋将军后退数步，口吐鲜血)
唐伯虎：对对就本为消闲作乐，今日穿祥兄竟然对对到呕十九几两血，可谓旷古烁今，小弟拜服拜服!
华太师：哈哈~~~~华安，呢度冇你嘅事喇，你快啲出返去扫地啦!
唐伯虎：遵命!
华太师：哎，王爷，今日我呢个小小书僮多多冒犯，令到您发唔到烂渣添。哎呀，真系对唔住嘞!
宁王：好，(吩咐师爷，原来师爷就是夺命书生)夺命书生，快啲攞皇上御赐嘅《春树秋霜图》畀太师睇吓。
夺命书生：系!一齐欣赏欣赏!太师，请接画!
华夫人：小心!(将画接住) 噉睇唔方便，不如过嗰边睇咧!
(两人打斗)
夫人：咁名贵嘅画，都系收好佢好啲!
夺命书生：华夫人，咁快睇完啦?大把时间!
(又打!直打到桌子底下)
夏香：死嘞，夫人唔知有冇危险呢?秋香姐，我哋去睇吓咯!
秋香：(点头)好呀!(四香伸头到桌底下观看，结果都被打出来)
武状元：啊?!
唐伯虎：(又赶到)咩事鬼杀咁嘈呀?
武状元：唔话你知!
唐伯虎：秋香姐!
(四香被打得面目全非)
春香：我畀人踢咗三脚呀!
武状元：哎?!歪晒嘅?!
夏香：我畀人踢咗八脚啊!
石榴姐：(仰天长笑)啊哈哈~~~~~~~~~终于有人丑过我喇!哈哈哈~~~~~~~~
唐伯虎：秋香姐，究竟发生咩事呀?
秋香：(被打得像猪头)我中咗三十几脚!
唐伯虎：鬼吖——!
(唐伯虎双脚将秋香又踢到桌子下面，“鬼啊”夺命书生和华夫人惊得从桌下钻出，两人衣服换了过来)
宁王：吓?!
武状元：嗰个真系秋香嚟架!
石榴姐：系呀!佢系畀人打成噉架!
唐伯虎：咩话?!唔通系中咗武林中至恶毒嘅……
夺命书生：冇错!系至卑鄙至恶毒嘅“面目全非脚”。唓!争啲唔记得自己踢嘅，以为撞鬼添!
唐伯虎：啊?!秋香!
(将秋香从桌下拖出，一阵猛打，秋香又变成了人样)
秋香：我头先做咩呀?
唐伯虎：你正话中咗至恶毒嘅“面目全非脚”，处境好危险呀!好彩我及时用失传咗嘅绝学“还原靓靓拳”，帮你打回原形，你而家冇事嘞!
秋香：多谢你，华安!
唐伯虎：唔好客气啦!
秋香：我系咪还原晒嘞?
唐伯虎：哎，下巴好似重争少少喎。
秋香：噉你大力啲吖!
唐伯虎：aza!
华太师：吓?秋香，你重靓咗 !
(华夫人与书生再斗，夫人受伤，华安上去挡住，打斗中将画撕碎)
宁王：华太师，我一片好心攞幅画畀你欣赏，你不领情不得止，重撕烂佢?!
华太师：王爷息怒，华安唔系有心架。
宁王：你唔使多讲，你毁坏国宝，我听日告上皇上，我睇你今次重唔满门抄斩!
唐伯虎：等等。
宁王：嗯?!
唐伯虎：王爷正话嗰幅《春树秋霜图》，我睇恐怕唔系唐伯虎嘅真迹嚟 !
宁王：大胆小书僮，你玩我呀?!皇上御赐畀我嘅名画，又点会系假架?!人嚟，发烂渣!
唐伯虎：咪住!其实真正嘅《春树秋霜图》不嬲都藏喺华府里头架!hai!唔信嘅话我即刻攞出嚟畀你睇!(拉秋香)秋香，跟我嚟!
夺命书生：王爷!
宁王：哼!好，我睇你攞啲咩出嚟!然后先将你哋冚家富贵!
(书房内)
秋香：华安呀，你搞乜鬼呀?!华府点会有唐伯虎家《春树秋霜图》啫?!你话而家点算好嘞?
唐伯虎：秋香姐，麻烦你帮我磨墨吖。
秋香：哎，而家冇办法嘞。噉吖，快啲帮我磨墨吖。
唐伯虎：吓?
秋香：吓咩啫!快啲帮我磨墨啦。我唯有凭自己嘅记忆去画，但唐伯虎嘅画意境咁高，我点模仿得到啫?只希望宁王佢唔识货，可以瞒天过海啦!冇可能嘅，宁王又点会唔识唐伯虎嘅画先得架?!华安呀，呢次闯咗大祸嘞，自己性命难保，亦都会连累华府架，噉而家点算好呢?你都系走罢啦!(开门准备让唐伯虎走)冇人呀，你快脆啲走呀。(回头看见唐伯虎己画好了画)
秋香：(惊)你画架?
唐伯虎：系，有个时期我系靠画唐寅嘅假画为生。呢幅《春树秋霜图》我画过百九几次，熟晒架嘞，希望可以过到骨啦。
(秋香看到唐伯虎的印章，很惊讶)
唐伯虎：哦，呢啲揾食架撑梗系要随身携带啦。
秋香：但系，你点会画得咁快嘅?!
唐伯虎：哎，今次算慢架喇!
(回到客厅)
唐伯虎：呢幅先至系唐伯虎嘅真迹呀，王爷。
宁王：你话真迹就真迹架喇?!有咩证据呀?
唐伯虎：唔啱王爷揾个专门人才嚟验验至讲咧!
宁王：对穿祥!(对穿祥还在呕血)嘿，未死吓嘛?!未死就过嚟验吓幅画，嚟!
对穿肠：哦哦哦!
华太师：(问唐伯虎)得唔得架?
唐伯虎：搏一搏吖。
宁王：哼哼哼(对肠穿验画，王爷得意的笑)。
对穿肠：王爷呀，呢幅真系唐寅嘅手笔 !
宁王：吓?!你有冇眼花呀?冇可能嘅!睇真啲!睇真啲!
对穿肠：的确系真架!不过啲墨迹好似未干噉嘅!
唐伯虎：近排回南天时，湿气重啫。
华太师：系，湿气重呀。
宁王：(气愤的将对穿肠打倒)死啦!
唐伯虎：王爷亦都太唔小心嘞，皇上御赐嘅画都会畀人调换，若然惊动到皇上，恐怕系死罪!
宁王：啊?!
华太师：不过，念在大家朋友一场，呢幅画就送咗畀你啦，以后啊要小心保管呀，唔系呀又畀被人调换呀!
(宁王欲动，被夺命书生劝住)
夺命书生：(对宁王耳语)王爷，今日有高人喺度，不宜久留呀。
宁王：好!我哋走!
华太师：哎，咪住!
宁王：啊?!
华太师：王爷，你咪话咗要发烂渣嘅?!唔记得咗喇?!
宁王：(恼羞成怒)好!(在客厅地上撒了一泡尿，众人瞠目)哼!问你怕未?哼!
(宁王人等出了华府，门口)
宁王：头先你做咩唔大开杀戒呀?
夺命书生：王爷，头先嘅书僮唔简单架，我差啲呀领嘢。
宁王：你有冇搞错呀?你又话书生夺命剑，威力无穷，天下第一嘅?而家小小一个书僮就畏首畏尾?!哎!
夺命书生：王爷，就系因为书生夺命剑威力惊人，小人恐防误伤王爷家嘛。
宁王：(上马)我今次呀畀你丢晒架嘞，走!(大队人马离开)
夺命书生：王爷，小人以性命担保，三日之内，等我回复元气之后，同你发佢烂渣，攞太师人头返嚟!
宁王：系呀，重有嗰个华夫人，嗨，重有个书僮，嗨，重有个秋香，嘿，横掂都系嘞，嚟个冚家富贵吖!
夺命书生：系!小人遵命!
(公子书房，两公子在侍候唐伯虎)
华武：大佬啊，舒唔舒服呀?
唐伯虎：几好吖。
华文：大佬呀，我收到风你寻日有一招“还原靓靓拳”，技惊四座，可唔可以帮我哋个样“扌耷”返靓啲呀?
华武：系咯系咯!
唐伯虎： 两位已经貌若天仙，都唔使再“扌耷”嘞啩?
华武：嘿嘿嘿，靓边度有人嫌多架，大佬?
唐伯虎：唔该帮我斟杯茶先再讲啦。
华武：(拍桌而起)有冇搞错呀?你讲唔该。服侍大佬系天经地义家嘛，你有咩理由讲唔该吖!
华文：讲唔该即系唔当我哋系僆啫，你令到我哋会好失望，而导致内分泌失调，大小便失禁，话唔定攋涿屎落你个头，就大家都唔好啦!
唐伯虎：喂，我讲声唔该啫，唔使攋屎咁大镬吓哗?
华武：你咪笑呀!
华文：玩呀?而家讲真架!
唐伯虎：明白。你两条废柴躝过去攞杯茶过嚟!
华文：系咯，噉先系架大佬。
华武：多谢大佬。
(华文、武刚要开门，正好华夫人和秋香进来)
华文、武：娘亲!
华夫人：做咩呀?去边呀?
华文、武：去斟茶啰!
华夫人：你哋出去先，我有嘢要同华安讲嘅。
华文、武：哦。
华夫人：坐吖。
唐伯虎：夫人请。
华夫人：华安呀，你立咗大功，呢度有一杯千年人参茶，好有益架，饮咗佢啦。
秋香：(递茶)华安。
唐伯虎：唔该晒，秋香姐。
秋香：唔使客气，趁热饮啦。
(唐伯虎将茶喝下)
华夫人：以你咁好嘅才华，应该考取个功名至啱架。点解会喺我哋华府做下人呢?
唐伯虎： 夫人，功名于我如浮云，在下一啲都唔稀罕。况且呢度有夫人同埋秋香姐对我咁好，我留喺度做死一世都抵吖!
华夫人：(起身，笑)好一个风流才子……唐伯虎呀?
唐伯虎：啊哈哈~~~~~~夫人唔系同我讲紧嘢吖嘛?
华夫人：重诈谛?!凭你高强嘅武艺，诗画嘅才华，都估到八九成啦。(坐到唐伯虎身边)我同唐家虽然有仇，不过寻日你舍身相救，夫人假假地德高望重，断唔会恩将仇报嘅，系咪认咗佢啰。
唐伯虎：莫讲我唔系吖，就算我认话系，夫人你到时反口，我都吹你唔胀亦掹你唔长，你即系明唔明我讲咩呀你?
华夫人：我明，我明。不过今日唔认总有一日要认架?
唐伯虎：噉听日先。
华夫人：咁窜?
唐伯虎：系吖!
华夫人：好，我重谂住，如果你认呢就将秋香许配畀你添。
秋香：夫人……
唐伯虎：系咪呀?!讲过嘢冇得唔算数架!冇错!我就系美貌与智慧并重，英雄同侠义嘅化身唐伯虎!
(秋香一惊，杯子摔碎在地上，门外众家丁将唐伯虎团团围住)
秋香：夫人--
华夫人：多事!
唐伯虎：夫人你--!
华夫人：冇错，系我反口啊!对于你呢种人我宜得你快啲死呀!
(众家丁欲擒唐伯虎)
唐伯虎：嘘……夫人，有事慢慢讲，何必动刀枪呢?
华夫人：哼，你而家求我咧咩?哈哈哈~~~唐天豪，你呢个负心人，当日我杀你唔死，今日我就要杀咗你个仔，都可以泄我心头之恨!
唐伯虎：哈哈哈~~~~唔好怪我坦白，就凭你一件番薯几件蛋散就想攞我唐伯虎嘅命，会唔会[开玩笑](国语)咗少少?
华夫人：哈哈~~~~我话畀你知，头先你饮嗰啲参茶，我已经落咗天下第一奇毒“一—日—冚—包—散”!
唐伯虎：哈哈~~~~天下第一奇毒，几时轮到你哋“一日冚包散”?!应该系我哋唐家嘅“含笑半步钉”至啱!
华夫人：哈哈~~~~废话!我哋“一日冚包散”系用七种唔同嘅毒虫，再加埋鹤顶红，提炼七七四十九日而成，无色无味，杀人于无影无踪。
唐伯虎：哼，我哋“含笑半步钉”系用蜂蜜，川贝，桔梗，加上天山雪莲配制而成，无须冷藏，亦不含防腐剂，除咗毒性猛烈之外，味道重好好添。
(两人面对镜头，响起谐趣音乐，成广告模式)
华夫人：食咗“一日冚包散”嘅人，一日之内会武功全失，经脉逆流，胡思乱想，以至走火入魔，最后会冚包散晒而死嘅。
唐伯虎：冇错嘞!而食咗“含笑半步钉”嘅朋友，顾名思义，系不能行前半步，或者面露笑容，否则亦会全身爆炸而死。实在系居家旅行--
华夫人：杀人灭口--
两人：(齐声)必备良药!
武状元：系呢，唔知喺边度可以买到呢吓?
唐伯虎：吓!呢位老细你有运喇，我呢度啱啱就有一粒。
华夫人：(抢过药丸)哼，呢粒烂药劲得过我嗰粒?!
唐伯虎：失礼，普天之下我粒最劲!
华夫人：讲嘢呀，讲到会转弯都得架啦!
唐伯虎：唔信呀?够胆啪一粒试吓!
华夫人：你睇死我唔敢啪吓哗?!
唐伯虎：就系睇死你唔敢啪!
华夫人：我就啪畀你睇!
唐伯虎：啪!
华夫人：啪咪啪啰!
唐伯虎：啪!
华夫人：哎，你个死仔吖睇死我!
唐伯虎：够羌(姜)你就啪!唔好讲咁多嘢呀。嚟吖!嚟吖!
(斗嘴)
华夫人：啪!(将药丸放在嘴边，停住)你当我白痴呀，戆居呀?!啪?!哈哈~~~~~ (嘴张老大，被唐伯虎将药丸拍进肚内)
唐伯虎：你唔戆居!系笨实啲啫!家吓大家都中咗毒嘅时间，不如攞解药出嚟交换当冇数咧?
华夫人：你个仆街仔吖，你抛我呀?
唐伯虎：夫人，搏唔过呀，你条命咁矜贵。
唐伯虎：人嚟!带佢入去柴房，锁喺度等死!
下人：系!
秋香：夫人，请你手下留情呀，何必两败俱伤?!
华夫人：唔使讲嘞!唓，区区“含笑半步钉”难得到我咩?最多唔笑唔行啫。(双脚蹦着走，绊在门槛上，摔倒)哎呀!
(秋香偷偷来到柴房)
唐伯虎：秋香?!
秋香：唔好嘈呀!我喺夫人嘅练功房嗰度偷咗好多药出嚟呀，你睇吓边一种可以解到你啲毒吖。
唐伯虎：要你冒啲噉嘅危险，华安真系过意不去。
秋香：重话自己系华安呀?!其实嗰次你画《春树秋霜图》嗰一阵，我已经知你系唐伯虎嘞。但我估唔到你够胆喺夫人面前承认自己嘅身份。
唐伯虎：秋香，其实我做所有嘢，完全都系为咗--
秋香：哎，我有个问题想问咗你好耐架嘞，你可唔可以答我呀?
唐伯虎：咩呢?
秋香：唐伯虎系咪你花名嚟架?
唐伯虎：唔系花名，点解噉问?
秋香：伯虎……白虎，哎，点解你阿妈帮你改个咁戆居嘅名嘅?
(唐伯虎沉思)
秋香：哎，你唔想答冇勉强 。
唐伯虎：多谢。
秋香：噉你钟意啲咩颜色呀?
唐伯虎：都好多架 ……譬如黄色吖。
秋香：(指自己的衣服)黄色?呢只黄色呀?
唐伯虎：系呀!
秋香：噉唔怪之得你成日都跟住我啦!
秋香：哎，你平时除咗画画之外，重有啲嗜好呀?
唐伯虎：嗯，都冇乜特别嘅，都系睇吓书呀，听吓音乐，吹吓箫呀噉。
秋香：你会吹箫?!
唐伯虎：系呀!
秋香：你会吹箫咁厉害架!
唐伯虎：哈哈~~~~得闲教你吖。
秋香：好呀!(坐在唐伯虎身边)你身为江南四大才子之首，会唔会有好大压力呢?
唐伯虎：哦，呢条问题问得好!压力呢，讲真都相当大。所以我一得闲呢都成日去旅行，减减压，噉你明唔明?
秋香：哦，我明我明。“含笑半步钉”呢只毒药系咪你发明架?
唐伯虎：边有呢只毒药架，我老作嘅之嘛。
秋香：你咁抵死。哗，你揾咗咁耐揾到解药未啫?
唐伯虎：(笑)冇樽系呀。哈哈……
秋香：吓~~~咁唔好彩呀?!
秋香：我想问吓你呀，其实你怕唔怕鬼架……
华夫人：唐伯虎，真系可恶!白白累我跳足几日。
秋香：夫人，既然你都冇中毒，不如大事化小，放咗唐伯虎啦。
华夫人：秋香，我念在你系我最宠爱嘅丫鬟，如果换咗第二个我一早将你赶出华府嘞，以后都唔准在我面前提唐伯虎!
秋香：夫人。
华夫人：即刻躝出去!
秋香：(跪在夫人面前)秋香跟随夫人多年，夫人对我恩重如山，今生今世报答不尽，秋香今日不孝，大胆请夫人放过唐伯虎一命，秋香愿替唐伯虎受罪，任由夫人处置。
华夫人：(大怒)秋香，你大胆呀!
三香：秋香姐，起身啦……
秋香：如果夫人唔答应，我系唔会起身。
三香：夫人……
华夫人：我决定咗嘅嘢，系唔会改变嘅!
三香：(也都跪下)夫人……
华夫人：做咩呀?一个二个做咩呀?
冬香：夫人，我哋同秋香姐情同姐妹，求你网开一面，答应秋香姐啦。
秋香：冬香。
春香、夏香：夫人，求吓你吖。
华夫人：噉即系算咩呀?!人嚟，拉佢哋出去!
三香：夫人!
华夫人：武状元，你死咗去边呀?
(突然武状元和许多下人摔了进来，原来是夺命书生大开杀戒)
华夫人：大胆夺命书生，够胆喺度捣乱!
夺命书生：华太师居然够胆得罪我哋王爷，上次你大命，今日我要将你华府杀个鸡犬不宁!
华夫人：华府唔到你喺度放肆!
(两人大战，华夫人受伤)
秋香：冬香，快啲通知太师呀!
(秋香赶到柴房)
秋香：(解开唐伯虎)快点走!
唐伯虎：做咩呀?
秋香：跟我嚟。(拉唐伯虎到后门)
唐伯虎：发生咩事啫?吓?
秋香：夺命书生大开杀戒!
唐伯虎：夺命书生?!
秋香：出便好危险，你快啲走啦!
唐伯虎：噉你呢?
秋香：唔好理我，走啦!(将唐伯虎推出门外，关上门)
唐伯虎：秋香!
秋香：夫人待我恩重如山，就算发生咩事我都要跟住夫人架。
唐伯虎：你开门先喇。
秋香：华安!我爱你!
唐伯虎：你讲咩话?!秋香!秋香!
(华府内，华夫人大战夺命书生)
华太师：快啲保护夫人走啦。(家丁四散)你哋走去边呀?(秋香走来)秋香，快啲叫华安嚟帮手啦，只有佢先可以顶得住架咋。
秋香：华安已经走咗嘞。
华太师：吓，华安咁冇义气?
华文：阿爹，娘亲都走，我哋都较咯。
华太师：哦。
(华夫人被打倒在地)
众人：夫人!
华太师：你点呀?
(秋香在关键时刻挺身而出，护在华夫人身前)
秋香：夫人!
(华府内，华夫人大败。在夺命书生的剑就快触到秋香的喉咙的一瞬间，唐伯虎赶到，将剑架开)
众人：华安!
华夫人：华咩安吖，系唐伯虎啊。小心呀你，你嘅毒未解架!
唐伯虎：放心，解药我已经喺练功房度揾到。我重趁住有少少时间，冲咗个凉，换埋套衫添。
唐伯虎：夺命书生，当年你用计打赢我阿爹，唔知而家可唔可以打赢埋我呢?
夺命书生：哦!原来你就系嗰个死剩种!唔难之得咁熟口面啦!
唐伯虎：今日我就要为先父报仇，我哋唐家霸王枪要重夺兵器谱上嘅排名!
大话周 星驰站 zhouxingchi.cn
(一番恶斗)
唐伯虎：回马枪!
(枪头被夺命书生打掉，枪柄插在夺命书生胸口)
夺命书生：哈哈哈，你老窦戆居，你重戆居，明知冇咗枪头，你重要厾!吓?
唐伯虎：边个话冇枪头唔厾得架?!
(原来枪柄己刺穿夺命书生的胸膛)
唐伯虎：我呢招已经练到唔使枪头都厾得入，抵输吖僆仔!
(夺命书生倒地身亡)
唐伯虎：从今开始，我哋唐家霸王枪重夺兵器谱排名第一位!
秋香：华安，你冇事吖嘛?
唐伯虎：我冇事，你呢?
华太师：嗨，太好嘞!你及时出现真系令我太感动嘞!唐伯虎，你救咗我哋华府上下，我都唔知点报答你至好呀!
唐伯虎：太师无需客气，我只系有一个要求……
华夫人：你唔使多讲喇，你钟意秋香吖嘛?!我就将佢许配畀你喇。
唐伯虎：(跳起)好嘢!
(婚礼大堂，二十个新娘盖着红盖头)
唐伯虎：哇嗨!乜咁多新娘响处嘅?
华夫人：唐伯虎，我虽然应承将秋香许配畀你，不过有条件，睇吓你嘅造化啦。你可唔可以喺二十个新娘里头选中秋香?华文!
华文：(读条款)点选时间以一柱香为限，即时生效。(武状元点香)点选规则如下：
一、点选人不准超越黄线观察新娘。
二、所有准新娘不准发出任何声音，违例者当弃权论。
三、不准使用任何物件接触准新娘之身体或衣物。
钦此!
华夫人：如果喺时限之内，你唔能够点中秋香嘅话，噉你就输咗，噉秋香就归我两个仔华文、华武所有。
华文：大佬，我哋执死鸡咋!
华武：唔好见怪呀!
唐伯虎：夫人，日光日白，好心玩少我一阵啦。
华夫人：唐公子，何出此言呀?
唐伯虎：喺啲噉嘅规则底下，我有乜可能点中秋香?我唐某本住天地良心，对秋香系一往情深，义无反悔，点解系都要一而再，再而三噉为难我?
华夫人：唐伯虎，你唔好唔记得，当初系你话家境清贫，甘愿到我哋华府为奴为仆。嗱，重有契约为凭，但系，你实在系为咗沟女!似乎系你玩我哋在先 !
唐伯虎：边个话?份契约嘅第一行头四个字唔该你打横睇睇。
(原来是“我为秋香”)
华夫人：我为秋香?!
唐伯虎：冇错!我为秋香!我一早已经表明来意，系你哋未够班睇唔出啫!
华夫人：你唔好谰醒，你捉我字虱之嘛，我系要玩死你!
唐伯虎：想玩我，读多两年书先啦!我而家就系要带秋香走，睇吓你哋有冇人拦得住我!
华夫人：试吓!呢度华府你敢乱嚟?!我叫太师禀告皇上，一于将你全家冚家铲!
唐伯虎：吓，你个八婆，背信弃义，卑鄙无耻!
华夫人：闹我八婆?!死啦!(扔东西)
唐伯虎：仆街吖!(扔回去)
华夫人：哎呀~~~~~~~我顶你个肺吖!
唐伯虎：嚟吖!
华夫人：唔好拉住我。
唐伯虎：打镬你呀，契弟!
华夫人：死啦。
(两人欲撕打，被旁人拉开)
华太师：停手!停手!唐伯虎，秋香始终系我哋华家嘅人，你想娶秋香做老婆系要依返我哋华府嘅规矩架噃!嗱，嗰炷香呢就嚟烧完嘞，你快啲谂返个好桥罢啦。
唐伯虎：好!我唐某今日就使出生平所学，誓要点到秋香为止!
(兵来将挡)
唐伯虎：气吞天下!
华夫人：无风起浪!
唐伯虎：如来神掌第一式--隔山打牛!
华夫人：移花接木!
唐伯虎：打孖嚟!
华夫人：我顶!(唐伯虎中招)
华太师：唐伯虎，你唔死得吖嘛?
华夫人：如来神掌?!挂腊肠就真!
唐伯虎：系你逼我出绝招嘅!(运气)龟--波--
华夫人：好强嘅气呀!
唐伯虎：气--
华文：佢嘅战斗数值竟然去到百九几万!
华武：唔通系超级萨亚人?
唐伯虎：功!
(气发出，众新娘均被顶飞，盖头纷纷落下。却有一半左右的新娘还带着面具)
唐伯虎：咩话?!
华夫人：哈哈~~~~~~~点呀，唐伯虎，你有张良计，我有过墙梯呀!
唐伯虎：你老母你出术阴我!
华夫人：你老窦我系阴你呀，你吹咩?(做鬼脸)
唐伯虎：小喇叭，打镬你呀……(欲上前，被拦住)
华夫人：支香熄咁滞喇，指定秋香嫁畀我两个仔啦!
唐伯虎：啊?唔通我唐某真系注定要孤独一世?天呀!别人笑我太疯癫，我笑他人看不穿，不见五陵豪杰墓，无花无酒锄作田。
(一准新娘身子动了动)
唐伯虎：我知嘞!(飞身将准新娘抱起，飞到房上吊灯上)
华文：(香灭)时间到嘞!
唐伯虎：啱啱好呀!秋香!(掀开准新娘的面具，竟然是石榴姐!)
唐伯虎：大佬呀，我有我念诗啫，你作乜叉嘢反应呀?
石榴姐：我冇做反应呀，我急尿打尿阵之嘛!
唐伯虎：有冇刀仔响身?
石榴姐：做咩呀?
唐伯虎：想自杀。
石榴姐：唔好呀，系都同我洞埋房先啦!
唐伯虎：(翻身让自己落下)畀我死咗佢呀!
武状元：(将唐伯虎接住)僆仔，连我条女石榴你都敢掂?!你条女喺嗰边呀!
(秋香由一婢女背着，慢慢出现)
武状元：哎，快啲去拜堂啦。
(众人鼓掌。鞭炮响起。彩礼抬到。)
武状元：嚟嚟，执正啲，执正啲，噉先似样家嘛!吓。
媒婆：拜堂喇。跪低啦。坐喺度啦，开始拜堂架喇。
(两从跪下)
华夫人：秋香，唐伯虎通过咗咁多重考验，我相信佢系真心爱你，我而家将你许配畀佢。
秋香：多谢夫人!
华太师：唐伯虎，你好满意啦!重有咩要讲呀?
唐伯虎： 人生大起大跌得太快，实在太刺激嘞，搞到我有少少急尿添。
华太师：急尿就未必，心急洞房之啩?哈哈哈。
华夫人：唐伯虎，唔好枉费我哋一番心意，以后要好好地对秋香呀。
唐伯虎：夫人，我重争啲怪错咗你添!
华文：一日大佬，一世都系大佬，我祝你哋年年有今日……
华武：岁岁有今朝!
唐伯虎：多谢你哋!
(唐伯虎与秋香含情相望)
唐伯虎：秋香，真系几经波折啊呵，好在……
秋香：终于有情人终成眷属。
唐伯虎(深情地)：嗯。
武状元：呵呵，恭喜恭喜……
华太师：喂，唐伯虎，你老婆红唇欲滴，面泛桃花，重唔即刻啜啖先?!
唐伯虎(欲亲)：嚟呀嚟呀……
秋香：咪住!猜返板先咧!
唐伯虎：吓?!
秋香：噉都唔识?!噉麻将，天九，骰子花灯十五胡都是但识饭啩?
(唐伯虎倒!)
(全剧完)
【看粤语剧本唐伯虎点秋香学粤语】相关文章：
看百变星君剧本学粤语08-18
学粤语字拼音快速打粤语字08-19
不会讲粤语的人如何学唱粤语歌08-27
即学即用粤语对话08-19
从零开始学粤语09-13
快速学粤语的方法09-12
粤语学习之香港粤语的特点10-18
学粤语必知的特殊句式08-21
学粤语必知的语法知识08-19